ಆಷಾಢದ ಬಿರುಗಾಳಿಯಂತೆ ತೂರಿ ಬಂದವು ನೆನಪುಗಳು
ಹಳೆಯದನು ಮತ್ತೆ ಕೆದಕಿ ಇರಿದು ಕೊಂದವು ನೆನಪುಗಳು
ನೆಮ್ಮದಿಯ ನಿದಿರೆಗೂ ಬಿಡದೆ ಹಿಂಡಿದವು ಕರುಳನು
ಸುಮ್ಮನೆ ಕೂತರೂ ಬೇಗುದಿ ಮಳೆ ತಂದವು ನೆನಪುಗಳು
ನನಗೀಗ ಬೇಕಿರುವುದು ಏಕಾಂತ ಎಂದಷ್ಟೇ ಹೇಳಿದೆ
ಆದರೂ ಹಗಲು ರಾತ್ರಿ ನನ್ನೊಳಗೆ ಬೆಂದವು ನೆನಪುಗಳು
ಕಾಲಚಕ್ರದಲಿ ಎಲ್ಲ ಮರೆಯಬಹುದು ಎಂದರು ಯಾರೋ
ಹಳೆ ಆಲದಮರದಂತೆ ಎದೆಯಾಳ ನಿಂದವು ನೆನಪುಗಳು
ಸಾಕಾಗಿದೆ ಸಾಕಿ ಮತ್ತೆ ಮತ್ತೆ ಈ ಯಾತನೆಗಳ ಸಹವಾಸ
‘ಗಿರಿ’ ನೀ ತೊರೆದರೂ ನಾವು ಬಿಡೆ ಅಂದವು ನೆನಪುಗಳು
ಮಂಡಲಗಿರಿ ಪ್ರಸನ್ನ ಮೂಲತಃ ರಾಯಚೂರಿನವರು. ಓದಿದ್ದು ಇಂಜಿನಿಯರಿಂಗ್. ಹಲವು ವರ್ಷಗಳ ಕಾಲ ಬಹುರಾಷ್ಟ್ರೀಯ ಕಂಪೆನಿಯೊಂದರಲ್ಲಿ `ಪ್ರಾಜೆಕ್ಟ್ ಮತ್ತು ಮಾರ್ಕೆಟಿಂಗ್’ ವಿಭಾಗದ ಅಧಿಕಾರಿಯಾಗಿ ಸೇವೆ ಸಲ್ಲಿಸಿ, ಈಗ ಸ್ವಯಂ ನಿವೃತ್ತಿ ಪಡೆದಿದ್ದಾರೆ. ಕನಸು ಅರಳುವ ಆಸೆ(ಕವಿತೆ), ಅಮ್ಮ ರೆಕ್ಕೆ ಹಚ್ಚು(ಮಕ್ಕಳ ಕವಿತೆ), ನಿನ್ನಂತಾಗಬೇಕು ಬುದ್ಧ(ಕವಿತೆ), ಏಳು ಮಕ್ಕಳ ನಾಟಕಗಳು(ಮಕ್ಕಳ ನಾಟಕ), ಪದರಗಲ್ಲು (ಸಂಪಾದನೆ), ನಾದಲಹರಿ(ಸಂಪಾದನೆ-2010) ಸೇರಿ ಒಟ್ಟು ಒಂಭತ್ತು ಕೃತಿಗಳು ಪ್ರಕಟವಾಗಿವೆ
Loading ...
